Denoncimi i fortë i Presidentit Nishani: Zgjedhjet u blenë

Presidenti Bujar Nishani ka hedhur dyshime të forta për rezultatin që prodhuan këto zgjedhje. Në cilësinë e kryetarit të shtetit, Bujar Nishani thotë se zgjedhjet u blenë. Ai u referohet informacioneve zyrtar që ka marrë nga institucionet e Shtetit.

Presidenti Nishani shton se se shitblerja e votës ka qenë një nga dy problemet e mëdha që shoqëruan zgjedhjet parlamentare “Informacionet e mia zyrtare, serioze tregojnë që është përdorur resurs i madh financiar për të blerë votat. Në të gjithë territorin shqiptar.” – tha Nishani

Presidenti sheh si prolem të parë mospjesëmarrjen dhe beson se shitblejra e votës ka ndikuar në mandate dhe rezultatin e përgjithshëm. “Nuk ka diskutim. Në mandatet dhe në rezultatin e përgjithshëm të zgjedhjeve. Për sa kohë ndikon në mandate, mandatet përbëjnë rezultatin e përgjithshëm të zgjedhjeve.”

Deklata e Presidentit u bë  në një intervistë me gazetarin Lutfi Dervishi, për emisionin Përballë dhe që transmetohet sonte në RTSH 1.

 Presidenti Nishani ka folur për mandatin e tij 5 vjeçar, marrëdhëniet me mazhorancën dhe jep vlerësim për zgjedhjet parlamentare dhe zgjedhjet në PD. Zoti Nishani është kritik për këtë fenomen ndaj organeve ligjvënëse. “Fakti që nuk ka pasur në raport me fenomenin, në gjykimin tim, nuk ka pasur minimumin e reagimit dhe goditjes së këtij fenomeni në përqindje, as minimumin në gjykimin tim, tregon që ose është toleruar nga institucionet e zbatimit të ligjit ky fenomen, ose kanë qenë të paaftë për ta identifikuar e për ta goditur.  Fenomeni i shitblerjes së votës po kthehet në një kulturë shoqërore për fatin e keq dhe që po thellohet”, – tha Nishani.

Nishani u shpreh edhe për zhvillimet në Partinë Demokratike dhe për të ardhmen e tij pas 24 korrikut, ditë kur mbaron mandati si President.

“Unë jam investuar në politike, por nuk kam asnjë platformë, asnjë ide, asnjë qëllim për t’u kthyer kryetar partie apo për t’u bërë kryetar partie apo për të krijuar një parti politike”,- tha Nishani.