Denoncimi: Tezat e maturës në këmbim të votës për PS

Sali Berisha denoncoi se këtë vit maturantëve po i jepen kopje gjatë provimit në këmbim të votës per Partinë Socialiste, dhe po penalizohen nxënës që nuk pranojnë t’i shesin votën për një provim.

Ditën e djeshme u zhvillua provimi i maturës për “Letërsinë”. Berisha publikoi në Facebook dy mesazhe të dërguara në adresë të tij.

Në mesazhin e parë thuhet se dy mësuese në funksion të PS-s, nxorrën kopjen e provimit të maturës, vetëm 10 minuta pasi filloi, në gjimnazin e Kavajës.

Në mesazhin e dytë thuhet se zyrtarë të Zyrës së Arsimit në Pukë i japin me telefon përgjigjet nxënësve që kanë premtuar të votojnë Partinë Socialiste, ndërsa një nxënësi që nuk pranoi të këmbente votën me provimin, e nxorrën jashtë me pretendimin se po përdorte kopjonte me telefon.