Deputetët e opozitës i zënë pritë Ramës jashtë Kuvendit

Pas seancës se tensionuar në Kuvend, ku deputetëve të opozitës ju hoq e drejta e fjalës, deputetët e PD dhe LSI kanë dalë jashtë Kuvendit dhe kanë menduar t’i bëjnë një rreng Edi Rama.

Në traditën e Kryeministrit, pas seancës ka pasur prononcime për gazetarët që ndjekin punimet e Kuvendit. Ndërkohë sot, deputetët e opozitës janë grumbulluar jashtë sallës së Kuvendit duke pritur që kreu i qeverisë të shkonte te gazetarët. Më pas, deputetët e opozitës do të ndërhynin për të mos lejuar Edi Ramën që të fliste. Një vendim i tillë ishte si reagim i heqjes së fjalës së opozitës nga foltorja e Kuvendit.

Por Edi Rama duket se e ka kuptuar këtë skenar të opozitës dhe pasi ka qëndruar për më shumë se 10 minuta jashtë sallës së Kuvendit, u largua pa dhënë asnjë prononcim për mediat.

Deputetët e opozitës thonë se përderisa mazhoranca nuk lejon opozitën të flasë në Kuvend, as mazhoranca nuk duhet të flasë jashtë Kuvendit.