Enveri në Pezë, reagon PD: Provokime të turpshme nga Edi Rama

Deputeti dhe nënkryetari i grupit parlamentar të PD-së, Enkelejd Alibeaj ka reaguar në lidhje e shfaqjen e fotove të Enver Hoxhës mesditën e sotme në Pezë.

Sipas tij, këto janë provokime të Edi Ramës, kur sot në Shqipëri ndodhen dhjetëra delegacione të NATO-s dhe dje u shemb kulla e antikomunistit, Prek Cali.

Reagimi i plotë i Enkelejd Alibeajt:

Provokimet e turpshme dhe brutale të Edi Ramës për ringjalljen e komunizmit nuk kanë të sosur!

Sot, në Pezë, iu shfaqi shqiptarëve pankartat me foto të Enver Hoxhës, para të cilave parakalojnë, me përulje dhe adhurim, qeveritarët, deputetët e tij dhe përfaqësuesit e pushtetit vendor!

E bëri këtë pasi Ministrin e Brendshëm dhe të Sigurimit të Shtetit e emëroi kryeparlamentar! Hetuesin e zellshëm të agjitacionit dhe propagandës komuniste e emëroi Ministër të Brendshëm! Mbushi radhët e qeverisë me pinjollë të nomenklaturës së lartë komuniste! Shembi dhunshëm kullën e simbolit antikomunist Prek Cali!

Pankartat e diktatorit qëllimisht ia vuri në dorë fëmijëve. Duke filluar te ata, kërkon të ringjallë dhe të riinstalojë komunizmin, pushtetin gjakatar të etërve të Edi Ramës dhe bashkëpunëtorëve të tij.

Për ata që nuk kanë parë ende, asgjë akoma, sot kanë mundësinë të hapin sytë fort dhe të kuptojnë, tek ato pankarta, fytyrën e vërtetë të Edi Ramës.?