Fshehje pasurie dhe pastrim parash, deputeti Alfred Peza merret i pandehur. Reagon avokati

Prokuroria e Përgjithshme i ka komunikuar akuzën për fshehje pasurie dhe pastrim parash deputetit të Partisë Socialiste Alfred Peza, ndërsa ka kërkuar të merret si i pandehur.

Prokuroria do të dërgojë dosjen në Gjykatën e Lartë për gjykimin e deputetit socialist. Peza ishte i pranishëm në prokurori së bashku me avokatin e tij Ardian Visha.

Burime nga Prokuroria e Përgjithshme, i thanë mediave se ndaj Alfred Pezës janë ngritur 3 akuza. Bëhet fjalë për akuzat e ‘fshehje të të ardhurave’, ‘Pastrim i produkteve penale’ dhe ‘Refuzim për deklarim, mosdeklarim, fshehje, ose deklarim i rremë i pasurisë’.

Pikërisht për këto akuza është njoftuar edhe avokati i Alfred Pezës. Dosja ndaj këtij të fundit është dërguar në Gjykatën e Lartë ku do të gjykohet për shkak të pozicioni të tij si Deputet i Kuvendit të Shqipërisë.

Vetë deputeti Peza nuk u prononcua për mediat duke iu përgjigjur gazetarëve me një “Faleminderit”, ndërsa sqarimet i dha avokati i tij mbrojtës, Ardian Visha sipas të cilit Prokuroria nuk ka asnjë provë për ta fajësuar klientin e tij.

Avokati mbrojtës, Visha: Çështjen e kam të fituar
Ardian Visha, avokati mbrojtës i Alfred Pezës, thotë se e ka të fituar çështjen në ngarkim të klientit të tij.
Sipas Vishës, Prokuroria nuk ka asnjë provë që bën me faj deputetin socialist.
“Ky rast nuk ka kënd që të qëndrojë në tokë. Prokuroria nuk ka asnjë provë. Për mua është rast i lehtë për tu fituar, pasi është i ndërtuar keq nga prokuroria. Çdo avokat do ishte i nderuar ta kishte si rast”, tha Visha.