Hapet Shkolla Kombëtare e Fluturimit, Rama: Do të trajnojë pilotë sipas standardeve të NATO-s, e hapur edhe për Kosovën

Kryeministri Edi Rama mori pjesë këtë të premte në ceremoninë e inaugurimit të Shkollës Kombëtare të Fluturimit, një strukturë e re që synon përgatitjen e pilotëve dhe kontrollorëve të fluturimit sipas standardeve të NATO-s, në kuadër të modernizimit të Forcës Ajrore Shqiptare.

Gjatë fjalës së tij, Rama tha se shkolla do të shërbejë jo vetëm për përgatitjen e pilotëve shqiptarë, por do të jetë e hapur edhe për trajnim dhe certifikim të pilotëve nga vendet aleate të NATO-s, duke veçuar Kosovën.

“Shkolla është e hapur edhe të për stërvitur dhe certifikuar pilotë e rinj të vendeve të NATO-s në vendin tonë, padiskutim duke filluar nga Kosova. Ministri i Mbrojtjes është ngarkuar të kërkojë nga Ministri i Mbrojtës i Kosovës nëse ka interes për të stërvitur këtu dhe certifikuar këtu pilotët e ardhshëm. Kjo shkollë gëzon kredibilitetin e padiskutueshëm të ekspertëve dhe eksperiencën e njerëzve tanë të Forcës Ajrore”, tha Rama.

Kryeministri vlerësoi transformimin e Forcave të Armatosura gjatë viteve të fundit, duke theksuar se ato kanë kaluar nga një situatë e vështirë në një forcë moderne dhe më të mirëpaguar në rajon.

 “Forcat tona të Armatosura, jo shumë larg, por një dekadë më parë ishin lënë në mëshirë të fatit dhe njerëzit tanë të zotë jetonin si në lëmoshën e shtetit. Sot  Forca jonë e Armatosur është më e mirëpaguara në rajonin tonë dhe ambicia jonë është që në rrugën drejtë Shqipërisë 2030 në BE, Forcat e Armatosura të jenë në mesataren e forcave të NATO-s sa i përket kontribut të shtetit për pagat e tyre. Më vjen mirë që jemi duke përjetuar një kapitull të ri në raportin e rinisë në forcat e armatosura. E kemi nisur këtë përpjekje me një vështirësi të jashtëzakonshme për të afruar të rinj, por sot është e vështirë të zgjedhësh mes kandidaturave të shumta që vijnë”, u shpreh kryeministri.

Duke folur për kapacitetet ajrore, Rama deklaroi se flota e Forcës Ajrore është tashmë plotësisht operacionale dhe e gatshme për sezonin veror, kur rreziku nga zjarret është më i lartë. Ai bëri me dije se një numër tjetër helikopterësh black hawk do t’i bashkohen forcave kapaciteteve të flotës shqiptare.

“Sot kemi një flotë ajrore tërësisht të gatshme, ndërkohë që na u desh të kalonim nëpër kalavare të panumërta me mirëmbajtje, ngecje, lloj-lloj çudirash dhe tani  jemi plotësisht gati edhe për të përballuar sfidën e sezonit të nxehtë ku beteja me zjarret është e pashmangshme. Të gjithë helikopterët e FA janë në punë dhe po punohet për të shtuar kapacitetet për sezonin. Një numër tjetër helikopterësh black hawk do t’i bashkohen këtyre forcave dhe Shqipëria do të bëhet vendi ku kapaciteti i helikopterëve, qoftë luftarak qoftë për emergjencat civile do të jetë ndër më të spikaturit e rajonit”, theksoi Rama.

/rtsh.al/