Ilir Meta, mesazh ngushëllimi për ndarjen nga jeta të Gjovalin Kadelit

Kreu i Kuvendit ka ngushëlluar familjen e deputetit të LSI-së, Gjovalin Kadeli për ndarjen e parakohshme nga jeta të tij, në një spital në Romë.

Në mesazhin e tij, Meta thotë se kjo është një humbje e madhe për të gjithë,  familjen, miqtë dhe shokët dhe kolegët e tij deputetë.

Mesazhi i Metës

Me pikëllim dhe trishtim të thellë mësuam për ndarjen nga jeta të mikut, shokut dhe kolegut tonë të dashur Gjovalin Kadeli.

Kjo ndarje e parakohshme dhe e padrejtë nga jeta e deputetit Gjovalin Kadeli është një dhimbje e madhe për të gjithë kolegët e tij të Kuvendit të Shqipërisë.

Ajo është një humbje e pazëvendësueshme për fëmijët e tij, për familjarët dhe të afërmit, për shokët e miqtë e tij të panumërt dhe për të gjithë përkrahësit e tij të përkushtuar në Lezhë, Kurbin, Mirditë e në gjithë Shqipërinë.

Ndonëse nuk do të jetë më mes nesh, me shumë dashuri, mirënjohje dhe rëspekt miku e shoku i dashur Gjovalin do të mbetet në kujtesën tonë dhe në mendjen e të gjithë atyre të cilet ndanë me të jo vetëm humorin tij të casteve të gëzuara por edhe vëmëndjen dhe përkushtimin e tij ndaj halleve e problemeve të jetës së njerëzve të thjeshtë.

I përjetshëm qoftë kujtimi i mikut, shokut e kolegut tonë Gjovalin!  

U prehtë në paqe shpirti i tij!

 Ilir META