Këshilltari i Trump: SHBA nuk përfshihet në idenë për shkëmbim territoresh Kosovë-Serbi

SHBA nuk do të përfshihet në idenë e propozuar nga Hashim Thaçi dhe Aleksandër Vuçiç për shkëmbimin e territoreve mes Serbisë dhe Kosovës.

Konfirmimi është bërë nga Këshilltari për Sigurinë Kombëtare në Shtëpinë e Bardhë, John Bolton.

Bolton, një diplomat karriere, ish-ambasador i SHBA në OKB dhe njohës i mirë i problemeve në Ballkan, cilësohet si një nga njerëzit më me ndikim në stafin e ngushtë të Presidentit Donald Trump.

Deklarata e bërë nga Bolton mund të merret dhe si një qëndrim zyrtar i Shtëpisë së Bardhë ndaj idesë që ka trazuar këto ditë Ballkanin për ndarje territoriesh.

Bolton ka deklaruar të premten në Kiev (Ukrainë) se “Uashingtoni nuk do të përfshihet në idenë për shkëmbim territoresh në mes të Kosovës dhe Serbisë“, raporton Radio Europa e Lirë.

I pyetur nga Radio Evropa e Lirë se çfarë mendon për idenë e shkëmbimit të territoreve në mes të Kosovës dhe Serbisë ai ka thënë:

“Çështja e arritjes së stabilitetit në Ballkan është shumë e rëndësishme për ne. Prej kohës së shpërbërjes së Jugosllavisë, ka pasur shumë tensione dhe rreziqe. Mirëpo ka pasur edhe zhvillim”, ka thënë ai duke iu referuar kontestit të emrit mes Maqedonisë dhe Greqisë.

Këshilltari i Presidenti Trump shtoi se: “Mosmarrëveshja në mes të Kosovës dhe Serbisë mund të jetë një nga çështjet më të rëndësishme. Shumë njerëz kanë tentuar të ndërmjetësojnë. Këto përpjekje kanë dështuar. Mirëpo unë mendoj se ka shenja të reja se të dyja Qeveritë mund të kenë vullnet për të negociuar këtë çështje në heshtje. Politika jonë, politika amerikane është që, nëse të dyja palët mund të punojnë me njëra-tjetrën për të arritur një marrëveshje, ne nuk përjashtojmë korrigjimet territoriale. Nuk na takon neve. Nuk do të jemi pengesë, dhe nuk mendoj se dikush në Evropë do të qëndrojë në mes, nëse të dyja palët në konflikt arrijnë një marrëveshje të kënaqshme. Ne jemi gati të ndihmojmë nga distanca apo nga afër. Ne nuk mendojnë se do ta zgjidhim atë (problemin) për ata. Ne mendojmë se ata duhet ta zgjidhin atë vet”,- tha Bolton.

Presidenti i Kosovës, Hashim Thaçi dhe homologu i tij serb, Aleksandar Vuçiç kanë hedhur ide të ndryshme për përmbylljen e procesit të normalizimit të marrëdhënieve ndërmjet të dyja vendeve. Presidenti serb ka hedhur idenë e ndarjes ndërmjet serbëve dhe shqiptarëve, ndërsa presidenti Thaçi, është deklaruar pro korrigjimit të kufijve me Serbinë, ashtu që Kosova të marrë komunat shqiptare të Luginës së Preshevës. Idetë nuk janë nuk janë mbështetur nga aleatët kyçë të Kosovës. Britania e Madhe dhe Gjermania kanë kundërshtuar një gjë të tillë.

Ndërkohë që së fundi vjen dhe konfirmimi i SHBA, se superfuqia botërore nuk do të bëhet pjesë e një skenari të tillë në Ballkan.