KQZ nga e hëna “vulos” rezultatet, si dhe shqyrtimin e ankesës për Idrizin

Komisioni Qëndror i Zgjedhjeve, do të nisë këtë hënë shpalljen zyrtare të rezultateve të zgjedhjeve sipas zonave elektorale. Klement Zguri thotë se KQZ ka 48 orë kohë për të bërë verifikimet për secilën kuti dhe nga e hëna do të nisë shpalljen e rezultateve zyrtare për qarqet Fier, Lezhë, Elbasan, Kukës dhe Dibër.

Deri më sot, kur kanë kaluar 6 ditë nga zgjedhjet e përgjithshme, pranë komisionit më të lartë të administrimit të zgjedhjeve nuk ka mbërritur asnjë ankim apo kërkesë, nga asnjë subjekt zgjedhor. Përjashtim bën vetëm PDIU e cila që prej 27 qershor I ka dërguar KQZ këtë ankesë, për problematikën e hedhjes së të dhënave të tabelave të grupeve të numërimit nga KZAZ-të. Bëhet fjalë për qarkun e Tiranës dhe për 4 qendra votimi, ku 31 vota të PDIU-së kanë shkuar gabimisht për PDS.

Këto vota, sipas PDIU-së nuk janë pasqyruar drejt nga grupet e numërimit dhe si këto raste janë edhe shumë të tjera të evidentuara, ndonëse zyrtarisht ankesa është bërë vetëm për këto 4 qendra numërimi.

Idrizi thotë se ende pret rezultatet dhe konfigurimin zyrtar nga KQZ. “Na duhet të presim hedhjen e të dhënave sipas procesverbaleve nga KQZ dhe rillogaritja e rasteve që kemi kërkuar rirregullim. Nuk mund të kem një shifër ekzakte për sa kohë KQZ, edhe pse kanë kaluar 6 ditë, nuk e mbyll ende hedhjen e të dhënave on-line. Të paktën të dihet ekzakt numri i votuesve dhe votave të pavlefshme apo të kontestuara, që të dimë sa është ekzakt 3%. Sigurisht që jemi të shqetësuar se pse KQZ nuk i hedh me procesverbal. Për të marrë mandatin duhen 11.500 vota. Këtu është problem i pragut 3%, i cili varet nga numri i votave pas verifikimit të të gjithë procesverbaleve, numrit të përgjithshëm të votave dhe numrit të votave të pavlefshme”, është shprehur Idrizi.

Janë vetëm pak vota ato që e ndajnë Shpëtim Idrizin nga mandati i tij i Tiranës dhe java e ardhshme do të jetë vendimtare nqs ai do të jetë apo jo pjesë e parlamentit të ri./TCH/