Kreu i Kuvendit, Gramoz Ruçi në ceremoninë e 68-vjetorit Republikës Popullore të Kinës

Kryetari i Kuvendit, Gramoz Ruçi mori pjesë në ceremoninë e organizuar nga Ambasada Kineze me rastin e 68-vjetorit të themelimit të Republikës Popullore të Kinës.

Në aktivitetin e zhvilluar në ambientet e Muzeut Historik Kombëtar u promovua njëkohësisht edhe botimi në shqip i librit të Presidentit Xi Jinping, të titulluar “Qeverisja e Kinës”.

Të pranishëm në këtë ceremoni ishin Presidenti i Republikës së Shqipërisë, Ilir Meta, Zëvendëskryeministrja Senida Mesi, Ministrja e Kulturës, Mirela Kumbaro dhe personalitete të tjera.

Gjatë aktivitetit, Kryetari i Kuvendit u takua me Ambasadoren e Republikës Popullore Kineze në Tiranë, Jiang Yu, të cilës i shprehu urimet më të sinqerta me rastin e 68-vjetorit të themelimit të Republikës Popullore Kineze si edhe vlerësoi marrëdhëniet e shkëlqyera mes dy vendeve tona dhe miqësinë tradicionale mes dy popujve tanë.