LSI sulmon ministrin e PD-së në kabinetin “Rama”, Vasili: Në Itali kapen qindra kg drogë, ministri thotë nuk ka më drogë

Lëvizja Socialiste për Integrim sulmon ashpër ministrin teknik të Brendshëm, Dritan Demirajn, të propozuar nga PD-ja si pjesë e paktit të 18 majit Rama-Basha për situatën më të fundit të trafikimit të lëndëve narkotike nga Shqipëria me destinacion Italinë.

Është kreu i grupit parlamentar të LSI-së Petrit Vasili, i cili përmes një reagimi në faqen e tij zyrtare në rrjetin social “Facebook” thekson se në një kohëqë në Itali kapen me qindra kilogramë drogë që vjen nga Shqipëria, Ministri i Brendshëm dhe policia e shtetit mohojnë të të ketë drogë të kultivuar në Shqipëri.

Sipas Vasilit, policia nuk e sheh dhe nuk e kap dot drogën, kriminelët dhe trafikantët; pasi siç thotë ai, s’kanë faj, janë një, janë bashkë, siç ishin edhe më 25 qershor.

Reagimi i plotë Petrit Vasilit

Kapen ne Itali përsëri qindra kilogramë drogë, që vjen nga Shqipëria.

Ministri i Brendshëm e pa nga ajri Shqipërinë dhe tha që nuk ka më drogë.

Po kjo drogë, nga na desantoi në Itali?

Ustallarët i paskan mbushur magazinat me drogë deri për në fund të shekullit. Policia nuk e sheh e nuk e kap dot drogën, kriminelët dhe trafikantët; s’kanë faj, janë një, janë bashkë, siç ishin edhe më 25 qershor.