Mbledhja e KLD, Meta: Ka vullnet maksimal për të punuar me organet e reja të Vetingut

Presidenti Ilir Meta është prononcuar për mediat në përfundim të mbledhjes së KLD-së, institucion që ai e mblodhi sot për herë të parë.

I pyetur mbi ecurinë e reformës në drejtësi dhe krijimin e institucioneve të reja, Meta tha se sistemi i drejtësisë ka problematikat e veta, se procesi është plot sfida,  porse ka vullnet maksimal për të punuar me organet e reja të Vetingut.

Presidenti Ilir Meta e mblodhi sot KLD-në për shqyrtuar punën e disa gjykatave lidhur me vendimet e dhëna për dhunën në familje, nisur nga vrasjet më të bujshme të ditë kohëve të fundit, si ajo e gjyqtares Fildese Hafizi nga i shoqi apo hedhja nga pallati prej të shoqit, e Liliana Rukos në Fier.

Prononcimi i Presidentit Meta, pas mbledhjes së KLD-së

Mbledhja përfundoi me një kohë të shpejtë, që do të thotë se vullneti për bashkëpunim, për të plotësuar të gjitha detyrimet që ka ky institucion deri në krijimin e institucioneve të reja kushtetuese është maksimal dhe në kuadër të përshpejtimit të zbatimit të reformës në drejtësi dhe sidomos të zbatimit të ligjit të Vetting-ut, por njëkohësisht edhe në drejtim të përballimit të sfidave që ka funksionimi aktual i sistemit gjyqësor, që natyrisht ka vështirësitë e veta drejt kalimit në një sistem plotësisht të ri.

Z. Meta, cilat ishin shqetësimet e KLD-së në lidhje me pikën e parë të rendit të ditës që ka lidhje me Vetting-un?

Unë besoj se këto do të bëhen publike, sepse diskutimet në KLD-së bëhen publike, por natyrisht që ky është një proces plot sfida dhe vullneti është maksimal për të bashkëpunuar me institucionet e reja të Vetting-ut, por edhe me EURALIUS dhe OPDAT-in që asistojnë në këtë proces.