Mediat serbe: Shqiptarët do të sulmojnë Nishin, Vranjën e Kralevën

Gazeta serbe Kurir shkruan se shqiptarët po planifikojnë të kryejnë sulme në Veri të Kosovës dhe jug të Serbisë, përfshirë Vranjën, Nishin dhe Kralevën. Kurir thotë se i referohet një dokumenti top sekret të shërbimeve të inteligjencës. Objektiv i sulmit, sipas gazetës, janë forcat e sigurisë të Serbisë. Organizatorët, sipas saj, janë Ramush e Daut Haradinaj dhe Sefqet Musliu, ish –komandant i UÇPMB –së që ndodhet në Kosovë. Lajmi nuk është komentuar nga institucionet zyrtare. Kurir është një media pranë qeverisë, por ajo ka spekuluar jo pak herë me lajmet që kanë të bëjnë me Kosovën e Shqipërinë. Për ngjarjet në Kumanovë ajo shkruajti se sulmi i vërtetë do të ndodhte me 12 maj, por kjo datë kaloi pa ndonjë incident.