Meta: E vërteta e ndarjes sime me Ramën dhe Bashën

Kryetari i Parlamentit Ilir Meta sqaroi se mes tij dhe Kryeministrit Edi Rama ka ndodhur një thyerje për dy çështje serioze.

Sipas Metës, çështja e parë është fakti se i doli kundër Ramës kur donte të kapte reformën në drejtësi dhe e dyta ishte fakti që Kryeministri donte të hynte në zgjedhje pa opozitën.

Ilir Meta saktësoi gjithashtu se krisja e parë mes tij dhe Ramës nisi pas rezultatit të zgjedhjeve lokale të 2015-ës.

Deklarata e Ilir Metës në Opinion:

Kanë ndodhur dy gjëra mjaft serioze mes meje dhe z.Rama.

E para që Rama donte të bënte një reformë në drejtësi për të kapur drejtësinë dhe për të poshtëruar opozitën. Unë doja të bëhej një reformë në drejtësi konsensuale dhe kam luftuar për këtë deri në fund. Kemi pasur debate për këtë. Unë nuk kam pasur hallin e PD, kam pasur shqetësimin e stabilitetit të vendit, të besueshmërisë së kësaj reforme.

Kjo ishte një mërzitje e madhe e z.Rama me mua. Thyerja mes meje dhe z.Rama ka filluar që pas zgjedhjeve lokale të 2015 kur doli rezultati i zgjedhjeve.

E dyta, ishte që ky i donte zgjedhjet pa opozitën. Nuk donte të ishte opozita në zgjedhje. E futi në zgjedhje për ta përdorur Bashën kundër zgjedhjeve. Është shumë e qartë. Gjithë marrëveshja e tyre është përpjekje e dy individëve kundër zgjedhjeve, për të zgjidhur problemet e tyre brenda partisë.

Për këto dy çështje madhore ai është shumë i mërzitur me mua dhe me LSI-në.