Meta: Të dënohen autorët e vrasjes së turistëve

Kryetari i Kuvendit z. Ilir Meta dënon me ashpërsi aktin barbar në të cilin humbën jetën në mënyrë brutale dy turistë çek, të cilët kishin zgjedhur të vizitonin Shqipërinë e të shijonin mikpritjen dhe bukuritë e saj.

Z. Meta u shpreh të gjithë solidaritetin familjeve të dy turistëve të vrarë dhe kërkon nga organet e zbatimit të ligjit të veprojnë me shpejtësi dhe të vendosin përpara drejtësisë autorët e këtij akti barbar, i cili bie ndesh me traditat e mikpritjes, bujarisë dhe besës së krahinës së Dukagjinit dhe gjithë popullit shqiptar.

Z. Meta thekson se akte të tilla dëmtojnë rëndë imazhin e vendit si një destinacion turistik dhe kërkon nga organet kompetente të marrin të gjitha masat që raste të tilla të mos përsëriten në të ardhmen.