Pas votimit të Kryeprokurores, kërkohet bashkëpunim tripalësh Kuvend-Qeveri-Institucione të pavarura

Një ditë pas votimit të tensionuar të kryeprokures së përkohshme nga mazhoranca në Kuvend, Kryetari i këtij institucioni Gramoz Ruçi kërkoi sot bashkëpunim tripalësh Kuvend-Qeveri-Institucione të Pavarura në kuadër të plotësimit të rekomandimeve për procesin e integrimit të vendit në BE. Deklaratat e tij kryeparlamentari Ruçi i beri në ambientet e Kryesisë së Kuvendit ku u zhvillua takimi i parë i Mekanizimit të Përbashkët për Monitorimin Sistematik të Ndjekjes dhe Zbatimit të Rekomandimeve të Institucioneve të Pavarura Kushtetuese dhe atyre të krijuara me ligj.

Ruçi: Unë sot kam disa mesazhe për kryetarët e Komisioneve të Përhershme Parlamentare dhe nënkomisioneve të Kuvendit: 

Është e nevojshme të bashkërendohet kalendari i komisioneve parlamentare për kontrollin parlamentar ndaj qeverisë me kalendarin e kontrollit për çështjet e rekomandimet e ngritura nga të gjitha institucionet e pavarura. 

Është me rëndësi që çdo komision të hartojë planin tematik të kontrollit parlamentar për çështje me interes publik ose për të cilat ka moszbatim të institucioneve të pavarura. 

Është e nevojshme të hartohet lista e dëgjesave dhe ajo e informacioneve me shkrim për gjetjet dhe masat e kërkuara në progres raportin e vitit dhe për niveline  zbatimit të masave që rekomandojnë prgres raportet. 

Komisionet të ndjekin me dinamikë zbatimin e rekomandimeve të mekanizmave monitorues, të konventave ndërkombëtare dhe të institucioneve të pavarura dhe hapat e hedhur me bashkëpunimin tripalësh Kuvend-qeveri -institucione të pavarura.