PD, amendament për Vettingun: Kuvendi të sigurojë staf

Ka nisur në Kryesinë e Kuvendit Konferenca e Kryetarëve nën drejtimin e Gramoz Ruçit. Në mbledhje do të shqyrtohet kërkesa e Partisë Demokratike për ngritjen e komisionit të Reformës Zgjedhore.
PD do të kërkojë gjithashtu të shqyrtohet kërkesa e saj për mbajtjen e referendumit për mbetjet, si dhe të futen në rend dite amendamentet e saj për organet e Vettingut.
Ndërkohë, Kuvendi do të mblidhet ditën e nesërme në seancë plenare, e cila pritet të shqërohet me debate të forta jo vetëm për buxhetin e vitit 2017 (një ndër pikat e rendit të ditës), por edhe për ligjin e Vettingut.
Prej ditës është hapur një debat i gjerë politik në lidhje me organikën e Vettingut, ku Komisioni i Ligjeve vendosi këtë javë shkurtimin e numrit të punonjësve të këtij ligji.
PD amendament për organet e Vettingut: Kuvendi po cenon efikasitetin e punës
Partia Demokratike ka paraqitur një amendament në Kuvend për organet e Vettingut. Anëtarët e djathtë dolën kundër vendimit të Komisionit të Ligjeve për shkurtimin e numrit të punonjësve të Vettingut dhe uljen e pagave të tyre.
Në lidhje me këtë, Grupi Parlamentar i PD me kryetar Edmond Spahon i drejtohet Kuvendit me një amendament, në të cilin thuhet se ligji i siguron institucioneve të rivlerësimit personelin e nevojshëm për të përmbushur detyrat.
Për pasojë, thuhet më tej në amendament, Kuvendi është i detyruar nga ligji të sigurojë stafin e nevojshëm për organet e rivlerësimit, duke e konsideruar numrin e personelit të propozuar prej tij si numër minimal të nevojshëm.