PD kërkon shkarkimin e Arta Markut: Të ndryshohet Kushtetuta, të zgjidhet me Veting

Partia Demokratike ka hedhur një sërë propozimesh sot për zgjedhjen e Prokurorit të Përgjithshëm në Komisionin e Ligjeve duke filluar nga shkarkimi i Prokurores së përkohshme Arta Marku.

Enkelejd Alibeaj kërkoi që të ndryshohet Kushtetuta, falë propozimit të 55 deputetëve dhe kryeprokurori i përkohshëm të zgjidhet jopolitik, nga Gjykata Kushtetuese dhe duke kaluar procesin e verifikimit ose ndryshe, Vetingut.

Alibeaj e quajti kupolën e Prokurorisë si një zgjatim i Kryeministrit. “Kërkojmë një mekanizëm zhbllokues për situatën”, tha ai.

“U larguan drejtuesit kryesorë të prokurorisë. U zhbë struktura që duhet të kishte vëmendje të përqëndruar mbi ekstradimin e Nezar Seitit. Por u bë për të humbur gjurmët,” theksoi Alibeaj.

Deklarata e Alibeajt u bë në mbledhjen e përbashkët të komisionit të Ligjeve dhe Këshillit të Legjislacionit ku diskutohet  kërkesa e  PD për ndryshime në Kushtetutë për emërimin e Prokurorit të Përgjithshëm.

Alibeaj: Ka një motiv nuk është neglizhencë, nuk është padijeni, nuk është mendjelehtësi, është dashje direkte dhe është instrumenalizim politik i prokurorisë për atë që ka ndodhur.

Sepse nuk ka mundësi që prokurori i përgjithshëm nuk e bën punë, që ministri i Drejtësisë jo vetëm nuk e bën punën, por shkel edhe ligjin. Që drejtoria e Përgjithshme e Burgjeve e kishte të magazinuar Nezar Seitin me një akt që ishte masa e arrestit e vendosur nga gjykata për llogari të krimeve të rënda.

Se nuk ka mundësi që Prokurori i çështjes që para gjyatës që do të jepte ekstradimin i thotë gjykatës nuk ka një procedim penal të Krimeve të Rënda në shtetin shqiptar dhe ka ndodhur në 18 dhjetor, kur të gjithë e dinin që Nezar Seiti për shumë arsye dhe një prej të cilave ishte arresti me burg për shkak të procedimit penal të Krimeve të Rënda. Se nuk ka mundësi që administrata e Prokurorisë që merret marrëdhëniet juridiksionale të mos e dinte, administratë kjo që për efekt të procedimit penal të Krimeve të Rënda ka dërguar dhe ka shkëmbyer letër porosi me autoritetet italiane të cilat i di prokuroria i di dhe ministria e Drejtësisë, i kanë kaluar para hundëve. Këto janë arsye që rrjedhin nga ajo që është prentendimi ynë i parë dhe motivimi për të ngritur amendamentet kushtetuese.  Prokurori politike, prokurori korruptive. Dy ishin kushtet bazë për të cilën bëmë reformë në drejtësi, sistemi i drejtësisë të ishte i depolitizuar, pikërisht për këtë arsye. Të kishte guximin profesional të ndeshej me pushtetin. I vetmi motiv, e vetmja arsye që në 2014 u nis reforma në drejtësi, i vetmi standard që kërkohej, krijimi i një sistemi drejtësise të luftojë pushtetin.