Presidenca ”vishet” portokalli, Meta: S’ka amnisti për dhunuesit e grave

Në kuadër të Ditës Ndërkombëtare për Eleminimin e Dhunës ndaj Grave dhe Vajzave, Presidenti i Shqipërisë, Ilir Meta, ka përçuar një mesazh.

Në një postim në facebook, Kreu i Shtetit, thekson se dhuna ndaj gruas nuk është burrëri por një pengesë e madhe e zhvillimit të shoqërisë. Në shenjë solidariteti, Meta thotë se Presidenca sot do të ”vishet” ngjyrë portokalli, në kuadër të fushatës botërore.

Gjithashtu, Presidenti përsërit qëndrimin e tij, se nuk do të amnisti për të dënuarit për dhunë në familje. ”Përsëris qëndrimin tim të palëkundur për të mos amnistuar asnjë të dënuar për vepra penale të dhunës në familje”,-thotë Meta.

Postimi i plotë

Dhuna fizike e verbale ndaj grave dhe vajzave është dobësi! Nuk është burrëri! Është një plagë e shenjë turpi për shoqërinë, një pengesë e madhe për zhvillimin gjithëpërfshirës, të barabartë dhe të qëndrueshëm.

Në Ditën Ndërkombëtare për Eliminimin e Dhunës ndaj Grave dhe Vajzave i bashkohem fushatës botërore “Ta ngjyrosim botën portokalli” duke i dhënë sot në mbrëmje këtë ngjyrë Institucionit të Presidencës.

Përsëris qëndrimin tim të palëkundur për të mos amnistuar asnjë të dënuar për vepra penale të dhunës në familje.