Presidenti Thaçi: Mezi po pres të takohem me Presidentin serb

President i Serbisë, Aleksandër Vuçiq, ka thënë se në Forumin Evropian që do të mbahet të shtunën në Alpbach të Austrisë, e në të cilin do të marrë pjesë edhe presidenti Thaçi, pret që të diskutohen të gjitha temat e rëndësishme, shkruan agjencia e lajmeve Tanjug.

Ndërkohë lidhur me këtë takim ka folur edhe Presidenti i Republikës së Kosovës, Hashim Thaçi, i cili ka thënë se po e pret me padurim këtë takim me Vuçiqin, shkruan Gazeta Express.

Një nga temat e cila ka ngjallur reagim të jashtëzakonshëm të opinionit publik në Kosovës, gjithashtu edhe të partive politike, ka qenë ideja e presidentit Thaçi për shkëmbim territoresh me Serbinë, ide kjo që u kundërshtua nga të gjithë.

Megjithatë, Thaçi duket se i qëndron prapa ende kësaj ideje, pasi të enjten në një shkrim në profilin e tij zyrtar, thotë se edhe ish-presidenti Rugova kishte qenë pro idesë së shkëmbimit të territoreve me Serbinë në vitin 1994. E ky shkrim i Thaçit ku thotë ta ketë cituar Ibrahim Rugovën, u kontestua nga shumë figura të Lidhjes Demokratike të Kosovës, të cilët thonë se nuk e mbajnë mend që Rugova të ketë thënë diçka të tillë. /Express/

Shtatori do të jetë një muaj i nxehtë për Kosovën e Serbinë.

Takimi i tretë në kuadër të fazës finale të dialogut në Bruksel, ku presidenti Hashim Thaçi pritet të hedhë në tryezën e bisedimeve edhe tezën e bashkimit të mundshëm të Luginës së Preshevës me Kosovën, vizita e presidentit serb Aleksandër Vuçiç në Kosovë ku është paralajmëruar edhe publikimi i një plani nga autoritetet e Serbisë, si dhe protestat e paralajmëruara nga opozita kosovare për ndërprerjen e bisedimeve me shtetin fqinj, pritet të ngrenë jo pak temperaturat politike gjatë muajit të ardhshëm.

Në fillim të shtatorit, do të mbahet takimi i tretë në kuadër të fazës finale të dialogut Kosovë – Serbi. Nga zyra e presidencës së Kosovës tashmë kanë bërë të ditur se në këtë tryezë do të diskutohet për çështjen e Luginës së Preshevës, respektivisht për kërkesën e shqiptarëve të Luginës për bashkim me Kosovën.

Kjo tezë e hedhur nga presidenti Thaçi, nën përcaktimin ‘korrigjim kufijsh’, i ka ndezur jo pak diskutimet edhe gjatë këtyre muajve, me përfshirjen në debate të Kosovës, Serbisë por edhe vendeve fqinje dhe fuqive të mëdha.

Aq sa edhe kancelarja gjermane, Angela Merkel, përsëriti jo një por disa herë, se në Ballkan nuk duhet të ketë ndryshime kufijsh. Po në shtator, do të vizitojë Kosovën edhe presidenti serb Aleksandër Vuçiç, i cili ka bërë të ditur se do të bëjë publik edhe një plan të detajuar për zgjidhjen e “çështjes së Kosovës”. Sipas tij, Prishtina dhe Beogradi nuk janë afër gjetjes së një zgjidhjeje, por ashtu siç ka bërë pala kosovare, edhe ai, do ta ketë një propozim/tch/