QSUT në partneritet me “San Raffaele”, Rama: Moment historik për shëndetësinë tonë!
Sot firmoset marrëveshja mes QSUT-së dhe Universitetit të Mjekësisë në Tiranë me Qendrën Spitalore Universitare të ekselencës evropiane “San Raffaele” dhe universitetin “Vita-Salute San Raffaele”. Ky partneritet synon ta bëjë QSUT-në dhe Universitetin e Mjekësisë në Tiranë pjesë integrale të tyre, duke u bërë një ofrues të një niveli evropian kujdesi dhe edukimi mjekësor.
Kryeministri Edi Rama e cilësoi këtë marrëveshje si një moment historik për shëndetësinë, QSUT-në dhe për Shqipërinë.
“Ky është një moment historik për shëndetësinë tonë, për QSUT-në, por edhe për vetë Shqipërinë. Sot hapim një faqe krejt të re, në një rrugë që ka qenë e gjatë, jo e lehtë dhe kishte një pikënisje që të thuash dëshpëruese është pak. Një sistem shëndetësor ku e vetmja vlerë ka qenë ajo e profesionistëve që në kushte skandaloze luftonin për të mbrojtur dhe shpëtuar jetë. Ndërkohë as nuk mendonin më dot se një ditë kushtet do të bëheshin ato që janë sot.
Përsëri ne jemi shumë më ambiciozë. Ambicia është që të bëjmë këtë qendër si pikë referimi të Ballkanit dhe ka kthejmë në një qendër ekselence mes qendrave të ekselencës në Europë. Dua t’ju përsëris diçka sot, nga grupi i ekspertëve që kanë ardhur këtu kanë vizituar çdo cep të qendrës spitalore kanë folur për mjek, përshtypja për personelin është e jashtëzakonshme. Ne kemi dëgjuar fjalët më të mira për ju, mjekët, personelin dhe kjo është baza e besimit tonë që ne mund ta transformojmë qendrën në një qendër ekselence për kujdesin shëndetësor në Ballkan”, tha ai.
