Raporti i ministrave të PD-së, Fleckenstein: Nuk ndikon në procesin e integrimit

Eurodeputeti Knut Fleckenstein, njëkohësisht reporter për Shqipërinë në Parlamentin Europian, deklaroi se raporti i ministrave teknik të Partisë Demokratike për zgjedhjet e qershorit nuk do të ketë një ndikim negativ në integrimin e vendit.

Fleckenstein shprehet në një intervistë për Report Tv, se raporti merr një vlerë tjetër, nëse edhe OSBE/ODIHR ka vërejtur të njëjtat shkelje dhe më pas mbetet për tu parë sesi do të veprojë qeveria.

“Raporti i ministrave teknik, jo domosdoshmërisht do të ndikojë negativisht në procesin e integrimit të vendit. Më e rëndësishme është nëse OSBE/ODIHR ka vërejtur të njëjtat shkelje dhe nëse po, se si qeveria do të merret me to.”

Eurodeputeti Fleckenstein thotë se kishte besim tek ministrant teknik, por vetëm raporti i OSBE/ ODIHR përcakton nëse ata kanë bërë gjithçka për garantimin e votës së lirë. “ Isha shumë i sigurt se “ministrat e rinj teknik” do të bënin çmos për të garantuar lirinë e votave. Por tani duhet të presim që raporti i OSBE-së të vlerësojë nëse është bërë gjithçka e mundur për të garantuar lirinë e votave të qytetarëve shqiptarë”, citohet ai.

Fleckenstein beson se partitë e opozitës janë garancia për shqiptarët dhe syri i tyre në qeverinë e re. Për qeverinë Rama 2, Fleckenstein shpreh besimin se fitorja absolute, nuk përbën një rrezik për demokracinë.

“Nuk kam dyshim se partitë e opozitës do të kenë një vështrim të afërt për procedurat dhe sjelljet e qeverisë. Sigurisht që ata do të informojnë publikun për vëzhgimet e tyre dhe qasjet alternative për mënyrën e mundshme të qeverisjes. Një shumicë absolute nuk është një rrezik për demokracinë”, deklaron Fleckenstein.