Reforma në Drejtësi, Xhafaj: Nisi, rruga është pa kthim

Në një bashkëbisedim me gazetarët, deputeti i PS-së dhe kryetar i Komisionit të Reformës në Drejtësi, Fatmir Xhafaj, deklaroi se “reforma në drejtësi ka nisur” dhe se “rruga është pa kthim”.

“Pas shumë sakrificash, vettingu fitoi. Keqardhje për kohën e humbur. Reforma në drejtësi ka nisur, rruga është pa kthim. Segmente të politikës së korruptuar dhe të gjyqtarëve kanë kohë që e ndjejnë frikën”, tha Xhafaj.

“Partia Socialiste bëri të gjitha përpjekjet dhe shqiptarët duhet ta vlerësojnë për këtë gjë. Reforma është angazhim dhe premtim i bërë nga ne në fillim të mandatit tonë dhe sot me krenari themi se është një nga premtimet më të mëdha të mbajtura në këtë legjislaturë. Ne do të luftojmë edhe për zbatimin e reformës në drejtësi, si garanci për qeverisje më të mirë”, shtoi deputeti socialist.

Xhafaj theksoi se shpreson “që 25 qershori të jetë dita që do të hapë epokën e njerëzve të drejtësisë. Uroj që të jetë dita që do të çelë epokën e shtetit të së drejtës”.