Saimir Tahiri: Nuk do të jem më Ministër i Brendshëm

Ndërsa bisedonte me të rinjtë e FRESSH në Jalë, Saimir Tahiri pranoi se nuk do të jetë Ministër i Brendshëm në mandatin e dytë të Rilindjes.

Thënë këtë, Tahiri përsëriti se kishte bërë më të mirën në punën e tij, duke i dhënë një mesazh edhe pasardhësit të tij, Fatmir Xhafës.

“Jo, unë nuk do jem ministër i Brendshëm dhe besoj që çdo punë e ka një fillim dhe një fund. Nuk ka rëndësi sa kohë je në një punë, ka rëndësi çfarë bën gjatë kohës që je. Unë them që u përpoqa të bëj më të mirën time. Besoj që cilido është pasardhësi, do e ketë të vështirë të zhbëjë gjithë atë që u rregullua”, tha ish-ministri.

Në dy muaj që Fatmir Xhafaj qëndroi në krye të Ministrisë së Brendshme u duk se ai pati si mision pikërisht të zhbëjë punën e Tahirit. Ndërroi me një të rënë të lapsit 33 drejtues të policisë, shkriu 3 komisariate dhe ndryshoi gjithë qasjen e policisë përkundrejt kanabizimit të vendit duke ndëshkuar shefat e policisë për indiferencën. Njerëzve të Tahirit, që i largoi nga policia i la mbi supe fajin për qindra tonelata me drogë që u kuptivua në Shqipëri. Pikërisht kjo peshë rëndon sot edhe mbi Saimir Tahirin, i cili është i qartë se nuk ka asnjë shpresë të rikthehet në polici.