Selami: Basha si Ramiz Alia, nuk pranoj post politik në PD të ofruar prej tij

Më 22 korrik anëtarët e PD-së do të votojnë për kreun e partisë e ku gara është mes Lulzim Bashës dhe Eduard Selamit. Ky i fundit, kur mbeten edhe katër ditë nga votimi, duket edhe më shumë i karikuar se sa kur e nisi këtë garë.

Nga deklarata të buta, elegante dhe më shumë me nënkuptime, duket se në finish ka qenë të jetë më i drejtpërdrejtë dhe më luftarak. Në emisionin “Debati në Channel One” të gazetarit Roland Qafoku, Selami hodhi akuza shumë të rënda ndaj rivalit të tij Lulzim Basha duke thënë se ai i ngjan Ramiz Alisë për mënyrën se si po vepron dhe funksionon në Partinë Demokratike.

“Ka humbur tre herë dhe nuk u largua nga drejtimi i Partisë”, tha Selami për Bashën. Gjithashtu ai qartësoi nëse do të pranonte post në PD pas zgjedhjeve, duke u shprehur se nëse do të humbiste garën e të shtunës nuk do të pranonte asnjë post politik në PD të ofruar nga Lulzim Basha.

“Unë hedh poshtë me neveri aludimet se më është afruar posti i sekretarit të Përgjithshëm në PD si shpërblim për të qenë kandidat përballë Bashës. Kjo është një shpifje dhe dashakeqësi”, tha Selami.