Soreca takon kreun e SPAK dhe të BKH-së: BE mbështet vijimin e Reformës në Drejtësi

Ambasadori i BE në Shqipëri, Luigi Soreca, ka zhvilluar sot një takim me kreun e SPAK, Arben Kraja dhe kryetaren e Byrosë Kombëtare të Hetimit, Aida Hajnaj. Soreca shkruan se ka folur me dy drejtuesit e institucioneve për arritjet e deritanishme dhe për të ardhmen.

“U takova sot me shefin e SPAK Arben Kraja dhe drejtoreshën e BKH Aida Hajnaj. Ne diskutuam për arritjet e deritanishme të SPAK dhe procesin transparent të rekrutimit për hetuesit e BKH. Është e rëndësishme të vazhdohet me të njëjtin intensitet dhe angazhim, duke pasur parasysh pritshmëritë nga SPAK për të vazhduar arritjen e rezultateve”, shkruan Soreca.

Diplomati shton se BE do të mbështesë SPAK-un dhe BKH-në pasi janë institucionet kryesore të Reformës në Drejtësi.  ”Theksova rëndësinë e ecjes përpara me trajnim të shpejtë dhe emërimin e hetuesve. Përsëris gjithashtu se BE është e gatshme të vazhdojë të ofrojë mbështetje dhe ndihmë të plotë për SPAK si një nga elementët kryesorë të reformës në drejtësi”, shton Soreca.