“Supriza” e qeverisë “Rama 2”, Majlinda Bregu Ministre e Diasporës?

Pas kritikave të ashpra që Kryeministri u bëri ambasadorëve shqiptarë dhe Ministrisë së Jashtme në lidhje me “zero rezultatet” mbi punën e tyre për të lobuar e sjellë në vend investitorë të huaj, po ashtu Rama lajmëroi dje edhe krijimin e një ministrie të re, asaj të Diasporës.

“Dua t’ju informoj që në funksion të këtij aspekti themelor të kësaj qasjeje të re, qeveria e re do të ketë dhe një ministër shteti ekskluzivisht për shqiptarët jashtë atdheut”.

Në ambientet politike po qarkullojnë disa kandidatura. Gazeta “Mapo” në një shkrim të sajën, shkruan se kandidatura më e përfolur është ajo e ish-ministres së Integrimit, Majlinda Bregu. Kjo pasi Bregu është një njohëse e mirë e proceseve integruese, ka edhe njohje me vlerë në nivele të larta të KE dhe PE çka e dëshmoi edhe me negociatat e fundit për krizën politike për bojkotin e zgjedhjeve nga PD.

Më tej gazeta shkruan se: “Vlerësimi i Ramës për punën e Bregut vjen që gjatë mandatit të kaluar qeverisës, ku ish-ministrja e PD mbante postin e kryetares së Komisionit të Integrimit. Në momente kyçe për fatin e hapjes së negociatave në mbledhjet e përbashkëta Shqipëri–BE, Bregu ka kërkuar gjithmonë hapjen sa më parë të këtyre negociatave”.

Kandidatura e Bregut është në diskutim dhe mund të realizohet me qëllim për të treguar hapje ndaj opozitës dhe pikërisht në një nga postet që ka të bëjë me raportet me jashtë.