Teatri/ Lubonja thirrje deputetëve socialistë: Mos e votoni atë projektligj!

Analisti Fatos Lubonja u bën thirrje deputetëve socialistë, “të cilëve u ka mbetur një fije yndyre”, siç thotë ai, që mos ta votojnë projektligjin e jashtëzakonshëm për Teatrin Kombëtar. Në emisionin “Studio e Hapur” me Eni Vasilin në “News24”, Lubonja tha se “ky projektligj është një ndarje e krimit me të gjithë bashkëparlamentarët e PS”.

Ai tha se shoqëria duhet të reagojë ndaj këtij fenomeni. “Një krim që e bëjnë Edi Rama, një grup njerëzish, oligarkësh, kanë synim ta ndajnë me të gjithë deputetët e PS, që nesër kur të vijë puna për të kërkuar llogari, të jetë puna ndryshe. Nuk bëhet fjalë thjesht për shembjen e Teatrit, por për gjithë atë pronë aty. Si ka mundësi që u bëka ligj për një kompani. Kjo tregon se ku po na çon kjo bandë, dhe se çfarë mund të bëjnë nesër. E kanë katandisur këtë vend si një minierë ku mund të gërmojnë e të shkatërrojnë për t’u pasuruar vetë”, u shpreh Lubonja.

Lubonja shtoi se është e papranueshme që bëhet një ligj për një kompani. “Si ka mundësi që u bëka ligj për një kompani? Ligji është një gjë e përgjithshme që nënkupton lidhur se si mund të veprohet për PPP. U bëj thirrje atyre deputetëve socialistë që kanë mbetur atyre dhe që ju ka mbetur një fije yndyre të mos e votojnë atë ligj”,- tha Fatos Lubonja.