“The New York Times”: Presidenti Ilir Meta ul tensionet në politikë

Vendimi i Presidentit të Shqipërisë, Ilir Meta për të shtyrë datën e zgjedhjeve të 30 qershorit është përhapur gjerësisht në mediat më të rëndësishme të botës. Media amerikane “The New York Times”, i ka dedikuar një shkrim vendimit dhe situatës politike. Kjo medie shkruan se Presidenti e motivoi vendimin me nevojën për të zvogëluar tensionet politike në vend. Kreu i Shtetit, tha se “rrethanat aktuale nuk sigurojnë kushtet e nevojshme për zgjedhje të vërteta, demokratike, përfaqësuese dhe gjithëpërfshirëse”.

Në artikull, thuhet edhe se vendimi i Presidentit erdhi edhe për të ulur krizën, që sipas Kreut të Shtetit, minon çdo shans për të filluar bisedimet e pranimit me Bashkimin Europian. “Presidenti tha se do të sqaronte vendimin e tij të hënën. Mijëra shqiptarë që mbështesin opozitën politike dolën në rrugë për një protestë anti-qeveritare të shtunën, duke i bërë thirrje Kryeministrit Edi Rama, të cilin ata e akuzojnë për korrupsion dhe manipulimin e zgjedhjeve në 2017”,-shkruan më tej “The New York Times”.

Nga ana tjetër, “The New York Times”, thekson me të madhe se mijëra shqiptarë që mbështesin opozitën politike u mblodhën për një protestë anti-qeveritare të shtunën. “Pas perëndimit të diellit, gaz lotsjellës dhe flakë u mjegulluan rrugët e Tiranës”, thuhet në artikull. Vendimi i Presidentit Meta ka patur jehonë edhe në media të tjera të mëdha, si “Washingtonpost”, “New York Post”, Francë 24m, ABC News në SHBA, etj.

Lexoni shkrimin Origjinal