Topalli dhe Imami: Lista e PD është nul, të shkarkohet Lulzim Basha

Ish-kryeparlamentarja Jozefina Topalli dhe ish-ministri, Arben Imami, dy nga ikonat e PD-së por të lënë jashtë listës të kreut Lulzim Basha për zgjedhjet e 25 qershorit, në një konferencë për mediat, kanë deklaruar se listat janë hartuar kundër statutit të PD-së, ku dhe kanë kërkuar mbledhjen e forumeve për shkarkimin e Lulzim Bashës.

Lista e PD-së u kundërshtua nga Majlinda Bregu dhe Astrit Patozi por që ka marrë mbështetjen nga Eduard Selami.

Gjatë konferencës, ish-ministri Imami u shpreh se listat u krijuan nga Basha dhe se janë në shkelje me ligjin. Sipas tij, këto lista të cilat kanë shfaqur probleme edhe sipas KQZ-së, automatikisht theksoi ish-ministri ato janë nul dhe janë në shkelje me ligjin.

“Gjendja e krijuar pas publikimit tëlistave ka krijuar një shqetësim të madh, probleme serioze, reagim qytetar, të militantëve të partisë, të kandidatëve që janë në lista. Ne e kuptojmë që mesazhi i tyre është nuk mund të largohet Rama duke shkatërruar PD-në. Vendimi për këtë listë është marrë nga një njeri i vetëm, në shkelje të statutit, në shkelje të çdo procedure normale, është marrë në shkelje me ligjin dhe ky fakt është nul”,-theksoi Imami.

Nga ana e saj ish-kryetarja e PD, Topalli, pak para konferencës në një postim të gjatë në facebook, u shpreh se prej datës 26 maj, PD nuk është më parti e dhjetorit 90, por një forcë politike klienteliste në duart e Bashës. Për Topallin, Basha është lider i rremë i “Republikës së Re”

Më tej në konferencë, ish-kryeparlamentarja, nënvizoi se:”Edi Rama do sundojë dhe do qëndrojë në krye të qeverisjes për një kohë të gjatë. Nuk i di hollësitë e marrëveshjes Rama-Basha, por preokupimi im është PD asaj që i kemi falur 20 vite të jetës dhe sigurisht na ka privilegjuar duke na dhënë besmin ndër vite”, u shpreh Topalli.

Të dy janë pjesë e të vjetërve në PD, që Basha nuk preferoi t’i rikandidonte duke i lënë kështu jashtë garës për deputetë të 25 qershorit. Vetëm pak më parë, Topalli përmes një deklarate për mediat shpërtheu kundër Bashës, duke e quajtur atë të rremë.

24 deputetët e grupit, të lënë jashtë listës