Vasili: Ruçi njeh 74 deputetë, opozitën e përjashton. Kuvendi jo pronë e PS

Kreu i grupit parlamentar i LSI-së, Petrit Vasili, ka denoncuar përjashtimin që Kuvendi i Shqipërisë i bën deputetëve të opozitës. Në një postim në facebook, Vasili shkruan se kreu i kuvendit, njeh vetëm 74 deputetë dhe për këtë ai nënvizon se kuvendi nuk është pronë e qeverisë dhe aq më tepër e PS-së.

”Skandal i padëgjuar, administrata e Kuvendit të Shqipërisë, tanimë e revolucionarizuar, është në shërbim të plotë vetëm të grupit të deputetëve socialistë dhe është thjesht një zgjatim i tij”,-shkruan Vasili.

Rasti në fjalë ka të bëjë me aktivitetet e fundvitit, ku ftohen vetëm deputetët e PS dhe vihen jashtë deputetët e PD-së dhe LSI-së. Më tej Vasili thekson edhe ftesën e kreut të qeverisë për të bërë dialog me opozitën kur në krahun tjetër, këtë sjellje e cilëson si shëmti politike dhe morale.

”Dashurinë e pakufijshme për kryeministrin dhe partinë ka plot forma për ta treguar, kjo që bëjnë është vetëm shëmti politike dhe morale”,-shkruan më tej Vasili.

Postimi i plotë

Per administraten e z. Gramoz Ruçi dhe per ministren Manastirliu ka vetem deputete socialiste. Parlamenti per keta ka vetem 74 deputete.

Skandal i padegjuar, administrata e Kuvendit te Shqiperise, tanime e revolucionarizuar, eshte ne sherbim te plote vetem te grupit te deputeteve socialiste dhe eshte thjesht nje zgjatim i tij.

Ndersa ministrja Manastirliu nuk e di qe Parlamenti ka 140 deputete dhe institucionet nuk jane prone e Kryeministrit dhe e socialisteve, por e popullit shqiptar.