Vettingu, brenda javës mësohen emrat e kandidatëve të zgjedhur

Brenda kësaj jave do të mësohet se cilët do të jenë emrat që partitë politike do të përzgjedhin për të bërë Vettingun.

Komisionet e posaçme parlamentare mbaruan dëgjesat me kandidatët që duan të reformojnë drejtësinë shqiptare.

Ndryshe nga herët e kaluara mbledhja e së martës së komisionit të vlerësimit të kandidaturave të Vettingut kaloi pa debate e kontestime të ndonjë emri të caktuar.

Për shkak të fushatës elektorale, duket se Vettingu ka kaluar në plan të dytë dhe vetëm 2 nga përfaqësuesit e opozitës ishin pjesë e mbledhjes.

Ndërkohë po për shkak të shpërndarjes së deputetëve për fushatë dhe pritjes së vizitës së një zyrtari të lartë amerikan, seanca plenare ku do të votohet lista me 27 njerëzit e Vettingut, është lënë për javën e ardhshme.