“Vettingu”, seanca e jashtëzakonshme, Meta batutë për Berishën

Munguan 3 muaj në seancat parlamentare, e sot në seancën e jashtëzakonshme, PD ka mbushur sallën e kuvendit. Teksa nisi dhe kjo seancë me 126 deputetë prezentë, debati dhe humori nuk mungoi që në fillim të seancës.

Seanca nisi me një kërkesë të Oerd Bylykbashit drejtur kreut të Kuvendit, Ilir Meta. Deputeti demokrat kërkoi që votimi i Vettingut të lihej për në fund të seancës duke thënë se kështu ishte rënë dakord në marrëveshjen mes palëve.

Gramoz Ruçi kundërshtoi kërkesën e Bylykbashit. “Pse të nisim me mosbesim këtë? Çështë ky kushtëzim që bëhet?”, tha Ruçi.  Por, Edi Paloka shpjegoi qëllimin e kërkesës së opozitës. “Qëllimi është që  ky vettingu i famshëm të jetë akti i fundit i këtij Parlamenti, kaq. Nuk është ajo që thotë zoti Ruçi”, deklaroi kreu i grupit parlamentar të PD.

Pas miratimit të procesverbalit seanca vijoi me votimet e dekreteve të shkarkimeve dhe emërimve të ministrave të qeverisë teknike.