Viktimat e komunizmit, Bylykbashi: Rama e nisi me rehabilitimin e Enver Hoxhës e tani kriminelët janë në majat e Ekzekutivit

Në përkujtim të Ditës Europiane të Viktimave të Nazizmit e Stalinizmit që u mbajt një ditë më parë në Tiranë, deputeti demokrat Oerd Bylykbashi ngre shqetësimin se kriminelët që siç thotë ai, vranë më shumë shqiptarë seç vranë gjermanët në Luftë ende nuk e shkarkojne ndërgjegjen, as duke treguar varret e atyre që vranë, e aq më pak duke kërkuar ndjesë.

Madje, thotë Bylykbashi përmes një komenti në faqen e tij zyrtare në rrjetin social “Facebook”, sot kanë marrë zemër e krenohen për regjimin e tyre kriminal.

“Edi Rama e filloi këtë me rehabilitimin e fotos së Enver Hoxhës dhe sot po ngre në majat e pushtetit ekzekutiv ata që në fundin e diktaturës torturuan apo dhanë urdhër për vrasje në sheshe, apo në kufi”- shprehet ndër të tjera Oerd Bylykbashi.

Komenti i Oerd Bylykbashit

Një shprehje thotë: Djallëzia më e madhe e Djallit qe atëherë kur bindi njerëzit se ai nuk ekziston.

Djallëzia më e madhe e komunistëve qe atëherë kur binden shqiptarët të harronin krimet e komunizmit.‎

Stalini vrau 20 milionë rusë. Mao Ce Duni, nën shembullin e Stalinit vrau 70 milionë kinezë. ‎Pol Poti, nën shembullin e Stalinit dhe të Mao Ce Dunit vrau 3 milionë kamboxhianë, ose një në tre vetë.‎ Hitleri nuk ua kaloi në sadizëm këtyre kriminelëve. Thjesht ishte një prej tyre.

Enver Hoxha vrau mijëra shqiptarë, madje më shumë seç vranë gjermanët (për këtë sfida është e hapur për këdo që të provojë me fakte dhe emra po aq të vrarë nga pushtuesi sa janë vrarë nga komunistët). Shumë prej tyre nuk u dihet varri dhe kriminelët që i vranë nuk e shkarkojnë ndërgjegjen, as duke treguar varret e atyre që vranë e aq më pak duke kërkuar ndjesë. Madje sot kanë marrë zemër e krenohen për regjimin e tyre kriminal. Edi Rama e filloi këtë me rehabilitimin e fotos së Enver Hoxhës dhe sot po ngre në majat e pushtetit ekzekutiv ata që në fundin e diktaturës torturuan, apo dhanë urdhër për vrasje në sheshe apo në kufi.

Por as Stalini, as Mao Ce Duni nuk i vranë vetë milionat.‎ Krimet e komunizmit janë krime kundër njerëzimit. Çdo krim ka një kriminel pas. Ky kriminel duhet çuar para drejtësisë. Duhen dënuar jo vetëm hirarkët e Byrosë dhe Komitetit Qendror, por të gjithë ata që morën pjesë në krim.‎ Ashtu siç u bë me nazistët në Nuremberg, siç u bë me ta më pas nga Izraeli dhe të gjithë shtetet e civilizuara. Ashtu siç dënohen sot e kësaj dite. Janë krime që nuk parashkruhen kurrë.

Duke u vënë emrin e kriminelëve dhe dënimin e tyre përkrah çdo viktimë, vetëm ashtu 23 gushti do të ketë kuptim për shqiptarët si përkujtim i krimeve të komunizmit dhe fashizmit.

Vetëm kështu do ndahemi nga e keqja më e madhe që u është bërë atyre ndonjëherë, Komunizmi.‎