Xhafaj: Një pjesë e ndryshimeve në Polici, për të luftuar kanabisin

Ministri i Brendshëm, Fatmir Xhafaj pranoi në Top Story këtë të hënë se një pjesë e ndryshimeve në Policinë e Shtetit lidhen me luftën kundër trafikut dhe kultivimit të kanabisit.

Top Channel ka hapur një sondazh në faqen e internetit, ku 62 përqind e lexuesve kanë lidhur këto ndryshime me luftën kundër hashashit dhe 38 përqind kundër.

Pyetjes së Sokol Ballës në lidhje me këtë, Fatmir Xhafaj iu përgjigj.

“Një pjesë e ndryshimeve është e lidhur me nevojën e luftës kundër kultivimit të kanabisit”, tha ministri i Brendshëm.

Xhafaj tha se vendimi për të marrë këtë post ishte vendimi më i vështirë në karrierën e tij politike. Ai nuk mohoi se emrin e tij e kanë kërkuar edhe ndërkombëtarët në krye të rendit dhe u shpreh se po të mos kishte mbështetjen e ndërkombëtarëve nuk do ta pranonte këtë post.

Vendimi për t’u bërë ministër i brendshëm ka qenë vendimi më i vështirë i karrierës time politike. Ka qenë një detyrë që nuk do ta dëshiroja kurrë dhe për shkak të detyrës. Fati, nevoja, kërkesa e kërkoi që të ulesha këtu.