Presidenti i Serbisë, Aleksandar Vuçiq, u premton qytetarëve miliona euro për të mbetur në pushtet dhe planifikon të largohet nga pozita e presidentit të shtetit, vetëm për t’u rikthyer si kryeministër dhe për të vazhduar qeverisjen sipas shembullit të idhullit të tij, presidentit rus Vladimir Putin, shkruan sot gazeta zvicerane Tagesanzeiger.
E përditshmja shkruan se Vuçiq ka premtuar pagesa të njëhershme për pensionistët, përfituesit e ndihmës sociale dhe të “ashtuquajturit veteranë të luftës, të cilët gjatë luftërave të shpërbërjes së ish-Jugosllavisë u kanë shkaktuar shumë të këqija popujve të tjerë”.
Në total, Vuçiq, “politikani më i fuqishëm i këtij vendi ballkanik”, ka premtuar rreth 600 milionë euro, dhe derisa opozita flet për blerje votash, Vuçiq pretendon se udhëhiqet vetëm nga kujdesi për mirëqenien e qytetarëve, shkruan Tagesanzeiger, përcjell danas, transmeton KosovaPress.
Gazeta zvicerane transmeton paralajmërimin e mjegullt të Vuçiqit se së shpejti do të largohet nga funksioni i kreut të shtetit, por gjithashtu vlerëson se fuqia shkon gjithmonë aty ku ulet Vuçiqi.
Synimi i tij, shkruan gazeta, është që para kohe të largohet nga pozita e presidentit dhe më pas të marrë postin e kryeministrit.
“Meqenëse ai dominon pothuajse plotësisht në peizazhin politik serb, pushteti zhvendoset gjithmonë aty ku ulet Vuçiqi”, shkruan e përditshmja zvicerane.
Kjo, siç shkruan gazeta, u dëshmua edhe “midis viteve 2014 dhe 2017, kur ish-ultranacionalisti me aftësi të kameleonit politik ishte shef i qeverisë”.
Nëse partia e Vuçiqit fiton dhe i mundëson atij të marrë postin e kryeministrit, në vend të presidentit do të vendosë ndonjë pasues besnik, i cili aty do të kryejë vetëm detyra ceremoniale.
“Ky manovrim të kujton rrokadën e Vladimir Putinit kur në vitin 2008 instaloi Dmitri Medvedevin si president të vendosur, mbajti të gjitha pushtetin në duart e veta dhe më pas në vitin 2012 u rikthye sërish në Kremlin”, vlerëson Tagesanzeiger.