Atalanta e nis me spektakël, mund me “poker” Torinon (VIDEO)

Atalanta e nis ashtu siç e mbylli sezonin duke marrë një fitore 4-2 në transfertën ndaj Torinos. Andrea Belotti zhbllokoi sfidën në minutën e 11-të, por Atalanta mori kontrollin e lojës dhe riktheu baraspeshën vetëm dy minuta më vonë me golin e kapitenit Alejandro Gomes, i cili shënoi pas një asisti të Duvan Zapatës.

Më pas ishin Luis Muriel dhe Hans Hateboer që shënuan në portën e Torinos, duke çuar shifrat në 1-3 për Atalantën. Në minutat e fundit të pjesës së parë Belotti shënoi sërish, këtë herë me asist të Mërgim Vojvodës dhe provoi të rihapë takimin. Llogaritë i mbylli Marten De Roon në fillim të pjesës së dytë, teksa mposhti për herë të katërt portierin Sirigu.