Barcelona 160 për Dybala, Juventusi jep këtë përgjigje në fund të merkatos

Juventus ka refuzuar ofertën ‘faraonike’ të Barcelonës për sulmuesin Paulo Dybala.

Drejtues të katalanasve kanë ofruar 160 milionë euro për transferimin e sulmuesit argjentinas, por i menjëhershëm ka qenë reagimi i drejtorit të përgjithshëm të “Zonjës së Vjetër”, Giuseppe Marotta, shkruan “Calciomercato.com”.

“Dje presidenti i Barcelonës, Bartomeu telefonoi Andrea Agnelli duke bërë një përpjekje për të transferuar sulmuesin Dybala. Argjentinasi është i pashitshëm sepse është baza e projektit të Juve, tani ka marrë numrin 10 dhe është e pamundur për të folur për një largim”, u shpreh ai.

Dybala nga ky sezon ka marrë numrin 10 në Juventus duke konfirmuar rëndësinë e tij në rritje te skuadra kampione nga Serie A.