Barcelona kërkon me ngulm transferimin e bomberit të Gironas

Barcelona është në kërkim të një sulmuesi, pasi Luis Suarez nuk mund t’i garantojë gjithë sezonin e mbetur. Largimi i Munir El Haddadi drejt Sevillas në fillim të ktij muaji, e ka bërë tepër të nevojshëm afrimin e një tjetër emri në Camp Nou, në mënyrë që të përdoret si zëvendësues i Luis Suarez, të cilit i nevojitet një frymëmarrje.

Emrat që qarkullojnë janë të shumtë, ndërmjet tyre dhe ai i Alvaro Moratas nga Chelsea apo Fernando Llorente por për të dy propabiliteti i transferimit drejt Barcelonës është zbehur. I fundit që lakohet këto ditë është sulmuesi i Gironas, Cristhian Stuani.

32-vjeçari, po kalon një formë mjaft të mirë, duke qënë edhe golashënuesi i tretë më i mirë i La Ligës këtë sezon, me 12 gola në 15 ndeshje, statistika që e rendisin atë pikërisht pas yjeve të katalanasve si Lionel Messi dhe Luis Suarez. Klauzola e largimit për Stuanit arrin në shifrën e 15 milionë eurove, të cilin blaugranët janë gati që të paguajnë.