“Camp Nou” si “Air Albania”, do të bëhet qendër vaksinimi në Spanjë

Stadiumi “Camp Nou” do të shndërrohet në një qendër të madhe vaksinimi. Kjo është ajo që raportohet nga Spanja, teksa autoritetet kanë zgjedhur stadiumin mitik si hapësirën më të përshtatshme për të kryer vaksinimin masiv të popullatës në Katalunjë.

Në mediet spanjolle raportohet se po ndiqet shembulli i stadiumeve në Shtetet e Bashkuara, teksa edhe në Shqipëri është ndjekur e njëjta strategji për vaksinimin ndaj Covid-19.

Autoritetet qeveritare kanë biseduar me drejtuesit e Barçës në lidhje me hapjen e stadiumit për këtë qëllim dhe ata janë shfaqur bashkëpunues. Fakti që do të bëhet në një impiant të tillë, shihet si nxitës edhe për të bindur ata që nuk kanë besim te vaksinat.