Conte komenton sherrin me Agnellin: Kërkoj ndjesë, reagova keq!

Antonio Conte doli në konferencën e zakonshme për shtyp në prag të ndeshjes me Lazion, por gjithçka e nisi me një ndjesë për episodet e pakëndshme të ndodhura në “Allianz Stadium” me presidentin e Juves, Andrea Agnelli dhe më pas foli me superlativa për bardhekaltrit.

“Ajo që ndodhi ishte e shëmtuar dhe e patë të gjithë. Dua të kërkoj ndjesë, pasi ofendimeve dhe provokimeve iu përgjigja në një mënyrë jo fort të përshtatshme. Duhej të isha më i qetë dhe më elegant, për të mos dhënë shfaqje të tillë.

Lazio? Është një kundërshtar i vështirë, që vjen pas disa fitoresh radhazi, ndaj do të jetë një test interesant. Pres një ndeshje të fortë, por edhe stimuluese, duke parë skuadrën që kemi përballë.

Është e vërtetë që krijojmë shumë raste, por shpërdorojmë po aq shumë. Duhet të përmirësohemi në këtë aspekt dhe të shënojmë pak më shumë. Në fund të fundit ndeshjet fitohen me gola dhe nëse nuk shënon, ndodh të eliminohesh si nga Champions dhe Kupa e Italisë”, deklaroi Conte.