Daja: Soue bëri diferencën, e pyeta nëse binte borë në vendin e tij!

Trajneri i Skënderbeut, Ilir Daja u shpreh shumë i lumtur pas barazimit ndaj Kukësit. Strategu i njohur vlerësoi veçanërisht sulmuesin Soue, i cili përmbysi i vetëm disavantazhin e dyfishtë.

“Jam i kënaqur me mentalitetin e fituesit që tregon ekipi. E morëm situatën nën kontroll edhe pas 2-0. Terreni nuk na lejonte të zhvillonim një futboll cilësor. Sot kishim shumë mungesa në formacionin bazë dhe lëvizje pozicionesh. E pyeta Souen nëse bie dëborë edhe në vendin e tij. Soue ka qenë pikë e fortë e jona, i kërkova Muzakës dhe Xhejmsit ta mbështesnin më shumë. Sot ai bëri diferencën, por jam i kënaqur nga i gjithë ekipi që tregoi forcë karakteri.

Veprimet e Soue ishin individuale, por sigurisht një lojtar nuk mund të bëjë gjithçka vetëm. Sot ai bëri diferencën, për të furnizuar linjat e dytë dhe për të dhënë asiste. Edhe ekipi i ka krijuar kushtet që të shprehet në këtë mënyrë.

E kemi tentuar me fillimin e kampionatit që t’u jepnim minutazh lojtarëve që kanë luajtur pak, pastaj morëm vendim që vendin e titullarit duhet ta fitojnë në stërvitje. Ndonjë që ka patur pak minutazh, por shprehet mirë, vendin e ka të hapur, duhet të tregojë vazhdimësi. Nimaga sot luajti mirë dhe nëse do të vijojë kështu do të ketë fanellë titullari.”