De Biazi: Duka duhet të rizgjidhet në krye të FSHF, për mua ka qenë i rëndësishëm!

Ish-trajneri i Kombëtares sonë, Xhani De Biazi ka shprehur hapur dëshirën që Armand Duka të vijojë të jetë në krye të FSHF edhe pas zgjedhjeve të 7 shkurtit. Paraardhësi i Panuçit ishte sot në Tiranë, ku ka vizituar nga afër ekspozitën e FSHF-së, të hapur së fundi në mjediset e Muzeut Kombëtar, dedikuar kësaj arritjeje historike të kombëtares sonë të futbollit.

“Për mua Armand Duka ka qenë një person shumë i rëndësishëm, ka bërë shumë për sportin dhe të mirën e vendit. Ka eksperiencën për t’i dhënë një shtysë të mëtejshme botës së sportit në Shqipëri. Është presidenti i duhur, që duhet të vijojë në krye të FSHF-së. Përtej meritave që ne i dimë, unë kam pasur një raport të shkëlqyer me atë, pasi gjithmonë më ka lënë të lirë për të vepruar si trajner. Kanë qenë vite të paharrueshme për mua”.