Dëmtimet kthehen në mallkim, Dembele humbet sfidën ndaj Juventusit

Barcelona pësoi dje një humbje befasuese ndaj Cadiz, por ky nuk është i vetmi lajm i keq. Ousmanne Dembele ka pësuar një tërheqje muskulore dhe nuk do të jetë i gatshëm për ndeshjen e mesjavës ndaj Juventus në Champions League.

Lajmin e bën të ditur vetë klubi katalanas, pas ekzaminimeve të kryera mëngjesin e sotëm, teksa Dembele mbrëmë u aktivizua vetëm 45 minuta. Lajm i keq për francezin, që po kalonte një periudhë të mirë. Në 12 ndeshje të luajtura këtë sezon ai ka shënuar 4 gola dhe ka dhuruar 2 asiste.

Dëmtimet janë pika e tij e dobët dhe tashmë do duhet të ndalet sërish. Ai ishte kthyer në fillim të këtij sezoni, pas një mungese prej më shumë se gjashtë muajsh.