Disiplina dënon Krymin dhe paralajmëron Tiranën

Komisioni i Disiplinës pranë Federatës Shqiptare të Futbollit është mbledhur sot për të analizuar sjelljet josportive të shfaqura gjatë javës së kaluar në fushat e futbollit, teksa vëmendja ka qenë te sherri Krymi-Bitri në ndeshjen Partizani-Vllaznia.

Të dy u ndëshkuan me karton të kuq nga arbitri Eldorian Hamiti, por Disiplina pezulloi me dy javë mesfushorin shkodran, që reagoi dhe goditi mbrojtësin e kuq.

Ndërkohë Komisioni i Disiplinës ka paralajmëruar edhe klubin e Tiranës, se do të ndëshkohet nëse do të kryejë sërish stërvitje në stadiumin “Selman Stërmasi”, ndërsa dënimet e tjera kanë qenë në ligat më të ulëta.

Vendimet e plota të Komisionit të Disiplinës:

1. Lojtari i KF Vllaznia, Ardit Krymi, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.
2. KF Tirana, në bazë të nenit 12 të KDS, paralajmërohet se në rast të përsëritjes së stërvitjes në stadiumin “Selman Stërmasi”, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
3. KS Kastrioti U-21, për braktisjen e ndeshjes së vlefshme për Kampionatin Kombëtar të Kategorisë Superiore U-21, kundër KF Bylis U-21, në bazë të nenit 54/1 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
4. Lojtari i KF Shkodra U-19, Albi Shpuza, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.
5. Lojtari i Shkëndija Dr. U-19, Eldi Mala, për lojë të rëndë ndaj kundërshtarit, në bazë të nenit 47/1/b të KDS, dënohet me 2 (dy) ndeshje pezullim nga aktiviteti.