Elis Bakaj braktis Kukësin, transferohet në Bjellorusi për 100 mijë euro

Elis Bakaj shumë shpejtë do të nisë një aventurë të re jashtë Shqipërisë. Pas eksperiencave në Rumani, Ukrainë, Izrael e Kroaci, golashënuesi më i mirë i Kategorisë Superiore në këtë sezon ka arritur akordin për transferimin në mes të sezonit në kampionatin bjellorus te skuadra e Shaktjor Soligorsk.

Autori i 12 golave në këtë kampionat me Kukësin është bindur nga oferta e klubit bjellorus dhe duke qenë se në këtë shtet merkato e futbollistëve është ende e hapur pasi sezoni i ri fillon pas disa ditësh, Bakaj ka vendosur të lërë përfundimisht verilindorët.

Nga shitja e 30-vjeçarit, Kukësi ka arkëtuar më shumë se 100 mijë euro një shifër e konsiderueshme kjo për një futbollist që në muajin qershor do të mbushë 31-vjeç.

Vetë Bakaj te Shaktjor Soligorsk një skuadër që në Bjellorusi kërkon të rivalizojë Bate Borisov në garën për titullin kampion, pritet të përfitojë rreth 15 mijë euro në muaj.