Gazetari italian: Shkoni në shtëpi! Edhe portieri iu bëri gol!

Më në fund, pas 15 javësh Benevento ka arritur të marrë pikën e parë në Serinë A, shkruan Gazeta Express.

Skuadra debutuese numëronte 14 humbje radhazi, por vikendin që lamë pas arriti të ndalë Milanin dhe t’i prishë debutimin Gennaro Gattusos, në krye të pankinës së Milanit.

Edhe më të dhimbshme këtë humbje e bën për Milanin fakti që një portier e shënoi golin e barazimit në minutën e 95’të, Alberto Brignoli, diçka që rrallë është parë në futboll.

Për këtë ka shpërthyer edhe gazetari i njohur italian, Tiziano Crudeli, që kurrë nuk e ka fshehur dashurinë për shtatë herë kampionët e Evropës.

“Shkoni në shtëpi. Edhe një portier iu shënon gol. Shkoni në shtëpi, turp, turp”, ishin fjalët e vazhdueshme të Crudelit që i përsëriste në TV.