Hamdi Salihi rigjen golin në Austri

Merr fund seria prej tre ndeshjesh pa fitore e Wienner Neustadt dhe gjithçka përkon me kthimin te goli i Hamdi Salihit.

Futbollisti shqiptar nuk gjente rrugën e rrjetës prej tre ndeshjesh dhe kjo përkoi me krizën e rezultateve të ekipit të tij që regjistroi dy barazime dhe një humbje gjatë kësaj periudhë duke rrezikuar të humbte edhe kryesimin e kategorisë së parë austriake.

Por Salihi u kthye sot të bënte atë që di më mirë, duke çuar topin në rrjetë në minutën e 70 të ndeshjes së sotme kundër Hartberg, për t’i dhënë fitoren 1-0 ekipit të tij.

Kësisoj, Neustadt vazhdon të jetë i pari në klasifikim, duke mbajtur pas krahëve Riedin, ish-skuadrën e Salihit që është ndjekësi më i afërt.

Ky ishte goli i 9-të në 13 ndeshje të luajtura nga sulmuesi shqiptar, i cili ka gjetur me rregullsi rrjetën në Austri, duke u kthyer në protagonistin kryesor të ecurisë pozitive të klubit në të cilin bën pjesë.