Hysaj: Shorti ishte pozitiv, kemi treguar se mund të mundim çdo rival!

Mbrojtësi i Kombëtares sonë, Elseid Hysaj ka komentuar shortin e Ligës së Kombeve. Futbollisti që aktivizohet në Itali beson se kuqezinjtë do të bëjnë një prezantim të mirë.

“Besoj se Kombëtarja tashmë luan mirë me të gjitha skuadrat. Nuk ka më diferenca. Shorti ka qenë i mirë. Kemi një mundësi të mirë për të shkuar në Europian. Edhe njëherë e them që shorti është i mirë. Të dy skuadrat janë të mira, të forta.

Por, kemi mundësi ta kalojmë grupin. Është pak e vështirë me Skocinë pasi kemi futboll të ndryshëm, megjithatë kemi treguar që kemi mundësi të mundim çdo kundërshtar. Do kemi kohë ta përgatisim sfidën”, u shpreh Hysaj në një intervistë telefonike për Super Sport.