Italia merr vendimin, Spalletti do të jetë trajneri i ri i Kombëtares

Brenda kësaj jave kombëtarja e Italisë do të njohë trajnerin pas dorëheqjes surprizë të Roberto Mancinit. Vendimi i tij, i kapi të gjithë në befasi, ndërsa që nga ajo ditë emërimi i pasardhësit është kthyer në një çështje të rrethuar me shumë polemika.

Kjo lidhet me emrin e Luçiano Spallettit, të përzgjedhurin e Federatës Italiane të Futbollit. Firma me ish-trajnerin e Napolit, kampion të Serisë A në sezonin e fundit është e vështirë.

Ai është ende nën kontratë me klubin napolitan, që kërkon rreth 3 milion euro për të aktivizuar klauzolën e lirimit. Avokatët kanë nisur punën për të zgjidhur këtë çështje, ndërsa gjithçka do të vendoset brenda fundjavës.

Luciano Spalletti është zgjedhja e parë, por në federatën italiane kanë edhe një plan B. Bëhet fjalë për Antonio Conten, edhe ky pa skuadër që pas largimit nga Totenhem.